Hun sawt tak an inthawk ta a ei lo tung le, thei tawp tak meu a ei lo insingsat mup mupna HSA, Jt. Hqrs., Delhi Freshers’ Social Meet vawi 25-na chu zani, September 4, 2010, khan ropui takin Community Centre, Sector-IV, RK Puram, New Delhi hmuna hmang zo a lo ni tah. Lungril a ei suongtuo lai chu ei sum ngirhmun en in thil namai a ni naw a. Hawphur a um hle bawk leiin eithuoituhai khawm an lu a’n hai deu cham cham niawm a nih. Amiruokchu, Pathien malsawmna le ei inthuruolna, zar chau a hi programme hi hlawtling thei a ni ti chu inhmai ruol a ni nawh. Mitinin tlawmngai tak a mani chanvo ei thlak leiin mawikhai tak in ei hmang zo thei a nih.
Hi Freshers’ Social Meet programme hi hun hni a the a ni a. Hun khatna hi chawhnung Dar 1(13:00 Hrs.) a tan ding ti a nih. Thuoitu le programme a chanvo nei bikhai chu a huna takah tlung kim hai sienkhawm mipui tieng ei la tlawm bek el leiin a hun takah chu ei tan hman naw rek phawt a. Amiruokchu, kum dang ang em em a ei inhnuksiet hma’n ei tan thei hram a. Nk. Hazel Pakhuongte le Tv. Lalneilien Inbuon in hnesaw takin hi hun khatna programme hi an mi vawng pek a. Rev. J.Thanglur in hun hawng tawngtaina a nei zo in item dang danghai chu a bat a bat a hmang pei a ni a. ATM Group haiin Opening Act mawi tak le dangdai takin boruok an hung thlak deu chum nghal a. Hi zo chinah chu mipui thafan khek ri a re ta meu nawh. Delhi Hmar Welfare Assaciation (DHWA) thuoitu tieng a inthawk thuhril tawi ngaithlak a ni nawk a. HSA Magagine tlangzarna hun Pu L.Keivom in a hmang a. Karlak a hin ei hlasakthiemhai a inthawkin hla mawi tak tak ngaithlak pei a ni bawk. Introduction of Freshers chu Nk. Esther Lalramhuol le Tv. Emmanuel R Lungtau haiin hnesaw takin an hung hmang a. An zei pahni hle. Hi hun a freshers mipui hma a ngirsuok a introduction nei po chu mi 39 an nih. Annihai ta ding bik atawngtaipekna Pastor Lalditsak Inbuon in a nei a. Infuina thucha Pu L.Thahgen, Adviser, HSA Delhi, in a hril. Tukum a freshershai aiaw a ngir in Tv. Eleazer Sungte in thuhrilna a nei bawk a nih.
Hi hun hi Cultural Show: A Fusion in a zui nghal a. Fahrel Tawk Lam mawi tak el inentir in a um a. Chuelbakachun, tulai thangtharhai ngainat rimawi mil zawng a rem Fahrel Tawk Lam tho niawm tak inentir a ni bawk. “Mipui mit a tlai hle” an ti chuh! Hi zo char hin Meritorious Award le Appretiation Award chi hrang hranghai peksuokna hun Nk. Dorothy Lalneizo, Secretary Education, HSA Delhi in a hmang a. Vangduoi thlak tak el in hi lai vel tak hin electric a hung thi ta thut el a. A buoithlak ta rek ngei ie. Lung a lo himaw hman de naka chu ei Comperes hai an fel in an zei hle. Hun khawral naw zawngin an mi’n hem pui a. Nk. Thlirnawnmawi, General Secretary, HSA Delhi chu Secretary Report pe dingin an ko a. Report a pek zo hin a la’n hma deu leiin ruoi a la’n pei naw deu a. Chu hun karlak a chun ei papui thenkhathai stage a ko kaiin game chikhat lo nei a nih. An nuhmeihai le an inhmu tanna dam, innei ding a an thlem dan dam, le thil dang dang an lo in hril tir tawl a. Mipui ta ding khawm a nghawkna hman um lo hiel in a lo in thaw chi ve tlat a nih. Hi zo hin Pu Timothy Shakum in ruoi inhlanna hun a hmang a. Ruoi ropui tak the mup mup a nih. Ei tuchahai inpak an um hle. Mi bak bak a sawl khawm inhuom a ei programme a hlawtling theina ding a an hung inpek hi a ropui takzet. Entawn thlak tak an nih. Chunakachun, ei bu le hmehai an la suong inhnik phien nawk nghal. Lawm an um taluo hi hril ngaina khawm a um naw a ni tak. Mipui an khawpin a tlai tlang hle.
Programme hun hnina chu Nk. Grace Mary le Tv. William R Darngawn in an vawng ve thung ta a. Tan char a inthawk in hla mawi tak takhai ngaithlak a ni nghal a. Chu zo a chun ATM Group ha’n Musical Drama-Tuoni Le Neilal 2010 ti an hung perform a. Ennuom a um le um naw chu zuk hril dan ding khawm a vang bak el a! An thaw sung po khan mipui khek ri chu a so veng vung zing a. Mipui lai khan ei lo thang ve chun hrie el ei ta; ei lo thang naw pal chun a thanghai indawn lem el ei tiu. Eini Hmar nauhai lai a ding chun thil la um ngai zen zen lo chu niin anlang. Hi hun hi Announcement of Mr. & Miss Freshers 2010 in a zawm a. Hi hun hi hun khatna a introduction inthawtirtuhai ma khan an hung hmang nawk a. Mipui an sukhlim hne hle. Nuhmei le pasal tieng a inthawk Top 4 thlangsuok ve ve an ni phawt a. Contest an nei hnung in Miss Freshers 2010 ding in Nk. Rody Inbuon thlang a ni a; Mr. Freshers 2010 ding in Tv. Alfred Pangamte thlang a ni bawk. Finance Report chu Tv. Zacharia Varte, Secretary Finance, HSA Delhi in a pek a. Vote of Thanks Tv. Lalremlien Neitham, Vice-President, HSA Delhi in a hril ve thung. Hieng items chi hrang hranghai karlak a hin ei hlasakthiem ha’n an mi’n awi zing bawk. Hi ni a ei na suktlaitu hlasakthiem ei neihai chu Nk. Chonthakim, Nk. Mary Jone, Nk. Roselyn Lalumpui, Nk. Zaithankungi, Pu Thanglalmuon, Pu Vanlalmuon Joute, Tv. James Vanlallur, Tv. Stephen Parate le Chronicles7 hai an nih. Mipui an inawi tlai hne dan chu; hne deu an nih. Lawm a um takzet. Chun, hun iemani chen a inthawk a re deu vang vang ta Kohran Inthuruollo Ruolchamhai khawm an hung che nawk thut a. Pu Lalruotthang a lo pension tak lei a Delhi a zuk suoksan el ding hi an inpam hle a. Ama puol a hla pakhat hung perform tum a hung inpuocha niin an inhril a. Amiruokchu, vangduoi thlak tak el in ama, Pu Lalruotthang hai nupa hi an lo tin hman char a, pawi ei ti pui hle a nih. Hun tawp a hnai deu deu a mipui hlak an phur deu deu. Ei Compereshai khawm an buoi hle. Ei hall hlak dar 10:30pm chen bak ei hmang thei si nawh. A tawp a tawp a chu suktawp a ngai tho tho ding a ni leiin inpam tak pumin Pu Laltlana Chhangte in tawngtaina’n ei Freshers Social Meet chu a mi lo khar pek ta a nih.
No comments:
Post a Comment